Garowe(pp) Ururka Ardayda Jaamacadda Bosaso University faraceeda magalada Garowe ayaa doortay gudoomiyaha ardaydda, ka dib munaasibad lagu qabtay isla xarunta Jaamacadda.
Doorashada gudoomiyaha ardaydda Jaamcadda Bosaso, waxaa kasoo qayb galay wasiirka waxbarashada Puntland, ku xigeenkiisa, gudoomiyaha xafiiska xaquuqul aadanaha iyo xildhibaan Siciid Cabdi Samatar Surcad.
Saddex xubnood ayaa hoggoonka ardayda ku tartamayey kuwaasoo kala ahaa Cabdirashiid Siciid Ashkir, Guuleed Maxamuud Cabdicasiis iyo Xaawo Axmed, waxayna doorashadu ahayd mid ardaydu ku codeynayaan sanduuqa.
Ugu danbeyntii ardayda ayaa gudoomiye u doortey Cabdirashid Siciid Akshir, waxaana la tartamayay Xaawo Abshir Maxamed iyo Guuleed Maxamuud Cabdisiis.
Gudoomiyaha Jaamacadda Bosaso qaybteeda Garowe mudane Cabdirisaaq Axmed Faarax ayaa ka waramay qaabka doorashada u dhacday iyo sida loosoo qaban qabiyay, waxa kale uu boggaadiyay sida ay ardaydu uga qayb qaateen doorashada, sidoo kale masuulkan ayaa u mahad celiyay macalimiinta Jaamacadda.
Wasiirka waxbarashada Puntland Mudane Abshir iyo ku xigeenkiisa Dr.Maxamed Cali Faarax ayaa hambalyo u diray gudoomiyaha cusub ee ardayda Jaamacadda Bosaso, waxa kale ay sheegeen inay ahayd qaabka doorashada u dhacday nidaam heer caalami oo wax dhuumasho ah ku jirin.
Wasiir ku xigeenka waxbarashada Dr.Maxamed Cali Faarax oo soo maamulay Jaamacaddan ayaa sidoo kale shegay inay muhiim tahay kor u qaadista tayadda tacliinta sare iyo Jaamacaddaha, waxa kale Dr.Faarax sheegay wasaradda waxbarashadu inay ka go’an tahay markasta sidii horumarinta waxbarashada kala duwan ee Puntland kor loogu sii qaadi lahaa.
Gudoomiyaha xafiiska xaquuqul aadanaha Puntland Maxamed Yuusuf Cali oo isaguna kasoo mid noqday madaxda Jaamacaddan ayaa soo dhaweeyay habka wanaagsan ee ardaydu u doorteen gudoomiyahooda cusub, sidoo kale waxa uu sheegay inay farxad galinayso in ardaydu ay dadaal ugu jiraan aqoonta.
Gudoomiyihii hore ee ardaydda Jaamacadda Bosaso ayaa u mahad celiyay gudoomiyaha cusub Cabdirashiid Ashkir, wuxuna sheegay inuu si wanaagsan ula shaqayn doono uuna ku qanacsan yahay qaabka doorashadu u dhacday, gudoomiyaha cusub ayaa dhankiisa u mahad celiyay mamulka iyo ardaydda Jaamacadda, wuxuna sheegay inuu ka shaqayn doono isku xirka ardaydda iyo ka war-qabkooda.
Jaamacadda Bosaso University ayaa xarunteeda weyn ku taala magalada Bosaso, waxayna ka mid tahay Jaamacaddaha mudooyinkii danbe ardayda kasoo baxa dugsiyada sare iyo kuwo tacliinta kale koror-sanaya galleen.
Puntlandpost.com
Xafiiska Garowe