Madaxweynaha Dawladda Puntland Dr.Cabdiweli Maxamed Cali Gaas iyo Waftigii ballaarnaa oo uu hoggaaminayey oo ka koobna labada gole ee Dawladda iyo xubno metelaya ururada bulshada rayidka ah ee magaalada Kismaayo kaga qayb gelay shirweynihii Madasha wadatashiga qaran oo saaka kasoo amba baxay magaalada kismaayo ee Xarunta kumeel-gaadhka Dawlad Goboleedka Jubba-Land ayaa maanta soo gaadhey magaalada Boosaaso ee Xarunta Ganacsiga Puntland.
Madaxweynaha Dawladda Puntland Dr.Cabdiweli Maxamed Cali Gaas iyo Waftigiisii ayaa intaasi kadib waxaa siweyn loogu soo dhoweeyey magaalada Boosaaso iyadoo ay kaqayb qaateen soo dhoweynta waftiga Madaxweyne ku-xigeenka Dawladda Puntland Eng.Cabdixakiim Cabdulaahi Xaaji Cumar Camey, Wasiiro, Xildhibaano Maamulka Gobolka Bari iyo kan degmada Boosaaso iyo dadweyne kale oo aad u to badan oo ku labisnaa calamada Puntland iyo Soomaaliya iyo dharka hiddaha iyo dhaqanka soomaaliyeed.
Madaxweynaha Dawladda Puntland Dr.Cabdiweli ayaa qolka Nasashada ee garoonka diyaaradaha ee caalamiga ah ee Boosaaso kula hadlay warfidiyeenada isagoona ka war-bixiyey safarkiisii shaqo ee muddada tobanka cisho ku dhow ay ugu maqnaayeen magaalada kismaayo iyo waxyaabihii ay kala kulmeen shirarkii ay kaga qayb galeen magaalada kismaayo.
Madaxweyne Cabdiweli Maxamed Cali Gaas ayaa ugu horrayn uga mahadceliyey Madaxweyne ku-xigeenka Dawladda Puntland, golayaasha Dawladda iyo shacweynihii reer Boosaaso ee sida aan kala harka lahayn u soo dhoweeyey, sidoo kalena Madaxweynaha ayaa uga mahadceliyey Dawladda Jubb-Land iyo Shacbiweynaha reer Jubba-Land sidii qiimaha lahayd ee ay usoo dhoweeyeen iyo marti soorkoodii wanaagsanaa muddadii ay ku sugnaayeen magaalada Kismaayo .
Madaxweynaha Dawladda Puntland Dr.Cabdiweli Maxamed Cali Gaas ayaa xusay in shirkii ay kaga qayb galeen magaalada Kismaayo ee looga hadlayey hannaanka geeddi-socodka doorashooyinka aan lagu tilmaami karin mid fashilmay sidoo kalena arrinta laga wada hadlayey aanay ahayn mid si sahal ah natiijo looga gaari garo.
“runtii lama orankaro shirku guuldaruu kusoo dhammaaday, waxa laga wada hadlayey masiirkii dalka weeye wax sahlan maaha, waxaana rajeynayaa ugu dambayntii wax Puntland iyo Soomaaliyaba dani ugu jirto in ay kasoo bixi doonaan shirarka soo socda”ayuu yiri Madaxweyne Dr.Gaas.
Madaxweynaha Dawladda Puntland ayaa sidoo kale sheegay in ay madasha shirka geeyeen aragti shacabka Puntland ee ku saabsanayd in Degmo wax lagu soo doorto iyadoona marwalba aan la hilmaamayn midnimada iyo qarrannimada soomaaliya.
“waxaan idiin sheegayaa anagu ka-xukuumad ahaan waxaanu meesha geyney mawqifkii shacbiga reer Puntland weeye, dabcan shacabka reer Puntland waxay noo wakiisheen inaanaan soomaali ka go’in wixii tanaasulaad ah oo soomaali dan u ahna aanu meesha geyno”ayuu yiri Madaxweyne Dr.Cabdiweli Maxamed Cali.
Ugu dambayntii Madaxweynaha Dawladda Puntland Dr.Cabdiweli Maxamed Cali Gaas ayaa sheegay in aan Puntland marnaba lagu faafin karin Mad-habka shiicada, guud ahaana shacabka reer Puntland iyo Soomaaliiyaba ay %100 yihii dad muslimiin ah oo Sunni ah.
—DHAMMAAD—
XAFIISKA WARFAAFINTA, WACYIGELINTA HIDDAHA IYO DHAQANKA EE MADAXTOOYADA DAWLADDA PUNTLAND.
The post Madaxweynaha Dawladda Puntland oo siweyn loogu soo dhoweeyey Magaalada Boosaaso. appeared first on Puntland Post.