Madaxweyne ku-xigeenka Dawladda Puntland ahna kusimaha Madaxweynaha Eng.Cabdixakiim Cabdulaahi Xaaji Cumar Camey ayaa maanta 25-Feb-2016 waxaa uu magaalada Boosaaso ee Xarunta Gobolka Bari kaga qayb galay isu-soobax roobdoon ah, kaas oo Eebbe lagaga baryayey in uu ka dulqaado abaaraha saameyey guud ahaan ummadda Soomaaliyeed gaar ahaan reer Puntland isla markaana uu ugu beddelo raxmaadkiisa khayrka qaba.
Isu-soo baxaas roob doonta oo ah lagu qabtay garoonka kubbadda cagta ee Boosaaso ayaa waxaa sidoo kale kasoo qayb galay Wasiiro, Xildhibaano, Isimo maamulka gobolka Bari iyo kan degmada Boosaaso, saraakiil kasocota Madaxtooyada Dawladda Puntland, culumaa’udiin iyo kumannaan dadweyne ah, kuwaas oo dhammaantood isugu soo baxay siday ilaahay uga baryi lahaayeen inuu ka feydo abaaraha dabada dheeraaday ee ka jira Puntland.
Madaxweyne ku-xigeenka Dawladda Puntland ahna kusimaha Madaxweynaha Eng.Cabdixakiim Cabdulaahi Xaaji Cumar Camey oo la hadalayey kumannaankii dadweynaha ahaa ee isu soo baxa roobdoonta kasoo qayb galay ayaa dadweynaha reer Puntland meelkastoo ay joogaan kula dardaarmay inay ilaahay u toobad keenaan, isla markaasina ay cafis weydiistaan si’uu ugu naxariisto.
Madaxweyne ku-xigeenka Dawladda Puntland ahna kusimaha Madaxweynaha ayaa sidoo kale ku boorriyey guud ahaan shacabka reer Puntland in ay is-naxariistaan isla markaana ay ka fogaadaan waxyaabaha macsida ah oo keenaya carada Eebbe.
Sidoo kale Madaxweyne ku-xigeenka Dawladda Puntland ahna kusimaha Madaxweynaha ayaa ilaahay uga baryey guud ahaan ummadda Soomaaliyeed gaar ahaa shacab weynaha reer Puntland meelkastoo ay joogaan in uu uga gar-gaaro abaaraha ba’an ee waxyeelleeyey dadkii iyo duunyadiiba isla markaasina uu ka waraabiyo raxmaadkiisa khayrka qaba.
Isu-soobaxan maanta la qabtay ayaa ahaa mid ay hore u iclaamisey Wasaaradda Caddaaladda ee Dawladda Puntland in uu ka qabsoomo dhammaan gobollada Puntland oo ay ummadda reer Puntland Eebbe kaga baryaan in uu ka dulqaado abaaraha ka jira Puntland uguna beddelo Roob iyo barwaaqo.
—DHAMMAAD—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
The post Madaxweyne ku-xigeenka Dawladda Puntland ahna kusimaha Madaxweynaha oo Boosaaso kaga qayb galay isu soobax roob doon ah appeared first on Puntland Post.