Madaxweyne Ku Xigeenka Puntland oo Ka Qayb Galay Munaasabad Lagu Xusayey Maalinta Beeraha Puntland

Madaxweyne Ku Xigeenka Dawladda Puntland Eng. Cabdixakiim Xaaji Cabdillaahi Cumar Camey ayaa maanta
13 April 2016  waxaa uu xarunta hay’adda PDRC ee Garoowe kaga qayb galay munaasabadda Maalinta Beeraha Puntland oo ay soo qaban qaabisay Wasaaradda Beeraha iyo Waraabka Dawladda Puntland, waxaana lagu soo bandhigay wax soo saarka Puntland oo ay ugu muhiimsan yihiin dalaga beeraha.  Munaasabadda waxaa sidoo kale ka qayb galay Guddoomiyaha Baarlamaanka Dawladda Puntland Axmed Cali Xaashi, masuuliyiin ka tirsan golayaasha Dawladda iyo ganacsatada ku howlan ee maal gelisa wax soo saarka beeraha Puntland.

Madaxweyne Ku Xigeenka Dawladda Puntland Eng. Cabdixakiim Xaaji Cabdillaahi Cumar Camey ayaa tilmaamay inuu ku faraxsan yahay inuu kasoo qayb galo munaasabad lagu xusayo wax soo saarka Puntland , isagoo Wasaaradda Beeraha iyo Waraabka Dawladda Puntland ku ammaanay sida ay ugu howlan tahay horu marinta wax soo saarka beeraha, sidoo kale Madaxweyne Ku Xigeenku wuxuu caddeeyey in qorshayaasha waxqabadka Dawladda Puntland ay ku jirto sidii loo horu marin lahaa wax soo saarka beeraha iyo khayraadka kale ee dalku leeyahay.

Madaxweyne Ku Xigeenka Dawladda Puntland Eng. Cabdixakiim Xaaji Cabdillaahi Cumar Camey waxa uu sheegay in ay muhiim tahay in la kordhiyo cilmiga beeraha si loo helo aqoon yahano takhasus u leh dalaga beeraha si dalaga kasoo go’a Puntland uu tayo u yeesho.

Dhinaca kale, Madaxweyne Ku Xigeenka Dawladda Puntland Eng. Cabdixakiim Xaaji Cabdillaahi Cumar Camey ayaa xarunta Jaamacadda PSU ee Garoowe waxaa uu kaga qayb galay munaasabad ay ku qalan jabinayeen 43-arday oo dhamaystay heerka koowaad ee tacliinta sare iyagoo ka baxay kulliyado kala duwan. Sidoo kale munaasabadda waxaa ka qayb galay Wasiirka Waxbarashada Dawladda Puntland Dr. Abshir Yuusuf Ciise, Marwada Madaxweynaha Dr. Hodan Siciid Ciise, maamulka iyo macalimiinta Jaamacadda PSU, masuuliyiin ka tirsan golayaasha Dawladda, arday, waalidiin iyo qaybaha kale ee bulshada.

Madaxweyne Ku Xigeenka Dawladda Puntland Eng. Cabdixakiim Xaaji Cabdillaahi Cumar Camey ayaa ardayda qalan jabisay ku amaanay waqtiga ay ku bixiyeen waxbarashada sare isagoo sheegay inay yihiin maskax iyo xoog cusub oo dalka iyo dadkaba usoo kordhay.

–DHAMMAAD–

Xafiiska Warfaafinta, Wacyi-gelinta Hiddaha Iyo Dhaqanka ee Madaxtooyada Dawladda Puntland.

The post Madaxweyne Ku Xigeenka Puntland oo Ka Qayb Galay Munaasabad Lagu Xusayey Maalinta Beeraha Puntland appeared first on Puntland Post.