Xaflad ballaaran oo lagu taageerayay Dr Siciid Cabdullaahi Dani oo ah musharax u taagan xilka madaxweynaha Somaliya ee doorashadda 2016-ka ayaa lagu qabtay hotelka Juba ee magaaladda Bosaso.
Xafladan oo ahayd qado sharaf ayaa waxaa ka soo qaybgalay masuuliyiin ay ka mid yihiin Duqa degmadda bosaso Yaasiin mire maxamuud, Taliyaha ciidanka Booliska puntland c/risaaq Afguduud, Isimo uu ka mid yahay Beeldaaje Cali Faarax, nabadoono, Aqoonyahano, siyaasiyiin hore, culuma’udiin, Ganacsato, Dhalinyaro iyo qaar ka mid ah haweenka gobolka bari.
Prof Axmed Maxamed Barre oo ugu horrayn xafladda daahfuray ayaa ka sheekeeyay taariikhda iyo waxqabadka musharaxa , waxaana uu sheegay inuu musharax yahay Aqoonyahan, Siyaasi, Ganacsade,ahna shaqsi firfircoon, oo howlkar ah, qayb libaaxna ka qaatay dib-u-yagleelidii waxbarashadda ahliga ee puntland, sidii kale ka qaybqaatay arrimaha bulshadda ee somaliya
“musharax Siciid wuxuu ku dhashay gobolka Banaadir sanadkii 1967, waxbarashadiisa hoose,dhexe,sare iyo jaamacadeedba waxaa uu ku qaatay magaalada muqdisho, waxbarshadisa heerka labaad ee jaamacadana waxaa uu ku qaatay dalka Malaysia” ayuu yiri prof Axmed bare.
“ 1991-kii burburkii ka dib wuxuu hormuud u ahaa dadkii bilaabay waxbarashada ahliga ah, wuxuuna ahaa asaasihii dugsiga Al-Nawaawi , waxaa kaloo uu asaasay hay’adda Tadamun iyo Xarunta TB-da ee ugu horraysay ee dalka laga hirgaliyo” ayuu sii raaciyay .
Duqa Degmadda Bosaso Ing Yaasiin Mire Maxamuud iyo Taliyaha booliska puntland C/risaaq Afguduud oo ka hadlay xafladda ayaa qiray inuu musharax Siciid Cabdullaahi uu yahay shaqsi u qalma uu dalka iyo dadka uu hoggaamiyo, iyadoo lagu miisaamayo wixii dadka soomaaliyeed u qabtay mudadii burburka.
Gees kale,Beeldaaje Cali Beeldaaje Faarax, Nabadoono, Aqoonyahanadii iyo Ganacsatadii kela ee ka hadashay xafladda ayaa taageeray musharaxa, waxayna aad ugu dheeraadeen tilmaamida iyo ka sheekaynta waxqabadkii wanaagsanaa ee uu dalka ka qaybtay xiligii uu ahaa u dhaqdhaqaaqaha arrimaha bulshadda iyo waqtigii uu noqday xildhibaan iyo siyaasi ka dhex muuqda dowladnimadda Soomaaliyeed.
Musharax Dr Siciid Cabdullaahi Dani waa xildhibaan ka tirsan barlamaanka federaalka somaliya, waxaa u u sidoo kale noqday Wasiirkii qorshaynta iyo xiriirka caalamiga ah xukuumaddii Cabdiweli sheikh Axmed, isagoo hadda si rasmi ah ugu dhawaaqay inuu yahay musharax u taagan madaxweynanimadda ee dowladda federaalka somaliya oo la dooran doono bisha September ee Sanadkan 2016ka.
PUNTLAND POST
The post Xaflad Lagu Taageerayay Musharaxa Madaxweynaha Somaliya Dr Siciid Cabdullaahi Dani oo Bosaso Ka Dhacday. appeared first on Puntland Post.