Addis ababa(pp) Madaxwaynaha Mamulka KMG Ah ee Jubba oo maalmii lasoo dhaafay ku sugnaa magalada Addis ababa ayaa waxa uu kulan gaar ah la qaatay Ra’iisulwasaraha Itoobiya Hailemariam Desalegn.
Kulanka ayaa waxaa looga hadlay arrimo badan oo Somalia ku saabsan gaar ahaan la dagalanka kooxda Alshabab iyo sidii taageero loo siin lahaa Gobaladda uu mamulka Jubba ka taliyo.
Ra’iisulwasaraha oo wafdiga Axmed Madoobe ku qaabilay xafiiskiisa ayaa sheegay inuu ku faraxsan yahay booqasha uu Addis ugu yimi wuxuna sheegay inay ka go’an tahay sidii dalka Soomaaliya loo caawin lahaa isla markasna loola dagaalami lahaa Kooxda Alshabab.
Madaxwaynaha Mamulka Jubba Axmed Maxamed Islaan Madobe ayaa dhankiisa sheegay inuu uga mahad celinayo Hailemariam Desalegn qaabilaada uu u sameeyay wuxuna ka codsaday in mamulkiisa taagaaro ballaaran la siiyo.
Mamulka Jubba iyo DFS ayaa sanadkii hore heshiis ku kala saxiiday magalada Addis ababa kaasoo lagu soo afjaray mad madow siyaasadeed oo labada dhinac soo kala dhexgalay,hase ahaatee arrimihii lagu heshiiyay wax badan kama qabsoomin.
Sida uu maanta sheegay Afhayeenka mamulka Jubba Cabdinaasir Seerar magalada Kismaayo ayaa laga qaban qaabinayaa shirwayna labaad ee dib u heshiisiinta Gobaladda Jubbooyinka.
Puntlandpost.com