Waxaa maanta Magaalada Garowe ee Caasumada Puntland si diiran loogu soo dhaweeyay Wasiiro iyo odayaal Dhaqmeed ka soo jeeda Dowlad deegaanka Soomalida Ethopia,kuwaasi oo Puntland u yimid ka qayb galka CaleemaSaarka Boqorka Beelaha Daarood Boqor Burhaan Boqor Muuse.
Wafdigaan oo ay hogaaminayeen Wasiirka Cadaalada Dowlad deegaanka Soomalida Ethopia Mudane Cabdi Xuseen Cabdi Sokor iyo Sidookale Garaad Kulmiye Garaad Maxamed Garaad Dool ayaa waxaa ka qayb qaatay soo dhawayntooda Wasiiro katirsan Xukuumada Puntland.
Waxana kamid ahaa Wasiiradaasi Wasiirka Arimaha Gudaha iyo Dowladaha Hoose Axmed Cilmi Cismaan Karaash,Wasiirka Amniga Mudane Xasan Aloore,Wasiirka Waxbarashada Puntland Cali Xaaji Warsame,Maamulka Gobolka Nugaal,Maamulka Degmada Garowe,Saraakil katirsan Madaxtooyada Puntland iyo Masuuliyiin kale .
Waftigaasi ayaa marki ay gudaha u soo galeen Magaalada Garowe,waxaa loo gudbiyay Aqalka Madaxtooyada Puntland,waxana halkaasi ku soo dhaweeyay Madaxwaynaha Dowlada Puntland Mudane Dr Cabdiwali Maxamed Cali Gaas.
Madaxwaynaha Dowlada Puntland Mudane Dr Cabdiwali Maxamed Cali Gaas ayaa sheegay in uu si aad ah ugu faraxsanyahay Wafdigaani balaaran ee ka yimid Dowlad deegaanka Soomalida Ethopia.
‘’Aad baan u soo dhawaynaya isimada iyo dhaqanka,waxaana runtii aad ugu faraxsanahay inaan booqday dowlad deeganka Soomalida aad bayna noo soo dhaweyen,waxana kajira dowlad iyo shacab wanagsan Puntland taasoo kalaa kajirta ‘’Ayuu yiri Madaxwaynaha Puntland .
Madaxwayne Mudane Dr Cabdiwali Maxamed Cali Gaas ayaa gaba gabadii cadeeyay In waftigaani Puntland u yimaaden sidii ay uga qayb qaadan lahaayen Caleemasaarka Boqorka 34-aad ee Beelaha Daarood Boqor Burhaan Boqor Muuse.
-DHAMMAAD-
Xafiiska Warfaafinta,Wacyigalinta,Hiddaha iyo Dhaqan ee Madaxtooyada Puntland .
