Garowe(PP) Dugsiga hoose/dhexe iyo sare ee Nugaal ee kuyaala magaalada Garowe ayaa lagu qabtay munaasabad ay xilka kula kala wareegayeen gudoomiyihii hore ee ururka ardayda Nugaal iyo gudoomiyaha cusub ee dhawaan ardaydu doorteen.
Munaasabadaan ayaa waxaa kasoo qeyb galay kormeeraha guud ee waxbarashada gobolka Nugaal Cumar Guureeye, maamulka iyo boardka dugsiga Nugaal, ardayda Nugaal wax ka barata iyo marti sharaf kal oo ka socotay dugsiyada kale.
Intii ay munaasabadaan socotay ayay ardaydu kasoo bandhigeen suugaan, majaajilo iyo gabayo ka turjumayay muhiimada waxbarashadu leedahay iyo sidoo kale hal-abuurka ardayda.
Khaalid Cabdulcasiis Cabdulle oo ah gudoomiyihii hore ardayda dugsiga Nugaal ayaa sheegay inuu wax badan oo horumar ah soo qabtay mudadii halka sano ahayd ee uu xilkaan hayay, wuxuuna ardayda ugu baaqay inay la shaqeeyaan gudoomiyaha cusub.
Gudoomiyaha cusub ee ardayda Nugaal Khaalid Cabdalle Jaamac ayaa dhankiisa sheegay inuu ku faraxsan yahay waxqabadka gudoomiyihii hore, isagana wuxuu sheegay inuu ku dadaalidoono inuu sii labo jibaaro horumarka dugsiga hoose/dhexe iyo sare Nugaal. Wuxuu sheegay inuu xooga saaridoono inuu ardayda ku wacyi galiyo muhiimada waxbarashadooda.
Maamulaha dugsiga Nugaal Cabdalle Saalim ayaa sheegay inay farxad weyn u tahay labada arday ee xilka isku wareejinaya inay yihiin labo arday oo qiimo weyn ugu fadhiya dugsiga, islamarkaana wuxuu ardaydiisa ku booriyay inay gacmo furan kusoo dhoweeyeen gudoomiyaha cusub lana shaqeeyaan.
Kormeeraha waxbarashada gobolka Nugaal Cumar Guureeye oo gabagabadii xafladaan ka hadlay ayaa sheegay inuu si weyn ugu riyaaqay sida ardayda ugu diyaarsan yihiin inay mustaqbalka noqdaan hogaamiyayaasha dalka, isagoo ku ammaanay hal-abuurnimadooda iyagoo da’yar iyo sida ay ugu heelan yihiin waxbarashada.
Cumar Guureeye ayaa ammaanay dugsiga Nugaal. Isagoo sheegay inuu yahay dugsiga dhinac walba ka dhameystiran.
Ugu dambayn xaflada ayaa abaalmarino lagu gudoonsiiyay arday ku guulaystay tartan kubada cagta ah oo loo qabtay fasalada dugsiga iyo abaalmarino kale oo la gudoonsiiyay macalimiinta iyo ardayda Nugaal ee saamaynta ku lahaa horumarka dugsiga sanadkii tagay 2015.
Dugsiga hoose/dhexe iyo Sare ee Nugaal ayaa la aas aasay sanadkii 2007, wuxuuna kamid ah dugsiyada gaarka loo leeyahay ee caasimada Puntland kuyaala.
Sawirro.
Puntlandpost.com
Garowe
The post Gudoomiyaha cusub ee ardayda dugsiga sare Nugaal oo xilkiisii la wareegay appeared first on Puntland Post.