Madaxweynaha dalwadda Puntland Dr. Cabdiweli Maxamed Cali Gaas ayaa maanta 28 July, 2016 magaalada Garoowe kaga qayb galay munaasabad loogu magac daray Bandhigga Buugaagta oo markii labaad lagu soo bandhigayo caasimadda dawladda Puntland ee Garoowe.
Munaasabadda ayaa waxaa soo qaban-qaabiyey hay’adda Cilmi baarista ee SIDRA iyo shirkadda Daabacaadda ee ScanSom, waxaana kasoo qayb galay Marwada Madaxweynaha Dr’s Hodon Saciid Ciise, guddoomiye ku-xigeenka Baarlamaanka, Wasiirro, Xidhibaano, Qoreyaal Soomaali iyo Ajaab isugu jirey iyo marti sharaf aad u tiro badan.
Munaasabadda ayaa waxaa lagu soo bandhigay in ka badan 570 buug oo ay qoreen Qoreyaal Soomaali iyo Ajaanib isugu jira oo ay ka mid ahayd gabar da’deeda lagu sheegay 12-sanno jir qoraa Soomaaliyeed ah, waxaana buugaagtaasi diiradda lagu saarayey dhaqanka soo jireenka ah ee Soomaalida, Murtida Soomaalida iyo Hodontinimada Afka Soomaaliga.
Madaxweynaha dawladda Puntland oo munaasabadda furay ayaa ugu horrayn bogaadiyey qoreyaasha kasoo qayb galay munaasabadda bandhigga buugaata, kuwaas oo ka kala yimi meelo aad u kala fog oo ka ka mid ah daafaha caalamka.
Madaxweynaha ayaa sidoo kale ka sheekeeyey qiimaha ay leedahay wax aqrinta iyo qorista isagoona tusaale u soo qaatay Aayadii ugu horraysey ee uu Eebbe kusoo dejiyey Suubbaneheena N.N.K.H in ahayd “IQRA” taas oo markhaati u ah qiimaha ay leedahay wax aqrinta iyo qorista.
Madaxweynaha ayaa sidoo kale sheegay in dawladda Puntland ay maktabaddeeda u iibin doonto 570 buug oo ka mid ah kuwaan maanta lagu soo bandhigay carwada bandhigga buugaagta, isla markaaana waxa uu ku boorriyey dadka reer Puntland ay ka faa’iideystaa qoreyaashaan aqoon yahanka ee soo gaarey Puntland.
—DHAMMAAD—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
The post Madaxweynaha dawladda Puntland oo Garoowe ka daah furay Carwada Bandhigga Buugaagta appeared first on Puntland Post.