Muqdihso: (pp)- Kulan maanta ka dhacay Magaalada Muqdisho ee Caasimada Dalka Soomaalya ayaa waxaa looga wada hadlay arimo la xiriira sidii ay Shirkadda Duulimaadka Yemen hawlo duulimaad uga bilaabi lahay Magaalada Muqdisho ee Caasimada Soomaaliya, Kulankan oo dhex maray Wasiirka Warfaafinta iyo Gadiidka Dawlada Federalka ah ee Soomaaliya Mudane C/llaahi Ciil-mooge Xirsi iyo Wakiilo ka socdey Shirkadda Diyaaradaha ee Yemen ayaa la isla gartay in shirkadaas hawlo dulimaad ka bilwdo Magaalada Muqdisho ee caasimada Soomaaliya.
Wasiirka ayaa warbixin la xiriirta ujeedada ay u yimaadeen Magaalada Muqdisho ka dhagaystay waftigan ka socdey Shirkada Diyaaradaha ee Yemen, Waxayna sheegeen inay danaynayaan isku xir duulimaad oo ay ka bilaabaan Dalka Yemen iyo Dalka Soomaaliya oo ah labo dal oo deris ah, ayna dadkooda si aada iskugu gudbaan.
Mudane Ciil-Mooge oo warbaahinta la hadlay ayaa sheegay inuu kulankoodu ku salaysnaa xiriir wanaagsan oo dhex mara Dalalkan Deriska ah ee Soomaaliya iyo Yemen wuxuuna sheegay inay Diyaarada Yemen hawlo duulimaad dhawaan ka bilaabo doonto Dalka Soomaaliya isagoo wax lagu farxo ku tilmaamay arintan, Sheegayna inay tahay arin ahmiyad weyn u leh Guud ahaan Dadka labada dhinac, wuxuuna sheegay inay arintani tahay mid taarikhi ah muujinaysana waaga cusub ee usoo ifaaya umadda Soomaaliyeed.
Ku-xigeenka Gudoomiyaha Shirkadda Yemen Airways Xusni Cali Xaydar ayaa isaguna si aada usoo dhaweeyey dulimaadka cusub ee ay ka bilaabayaan Magaalada Muqdisho ee Caasimada Soomaaliya, wuxuuna sheegay inay arintan go’aansadeen kadib markii ay arkeen xaalada Soomaaliya oo si aada isku badeshay ayna dib usoo noqonayso Dawladnimadii umadda Soomaaliyeed.
Isku soo wada duubo arintan ayaa qayb ka ah Beesha caalamka oo waayadii u dambaysay si aada u danaynaysay arimaha Soomaaliya kadib markii ay Soomaaliya u muuqatay mid dib cagaheeda iskugu taagaysa waxayna arimaha oo dhan rajo ku abuurayaan qalbigii angagay ee umadda Soomaaliyeed.
puntlandpost.com