Garowe (Puntland Post):- Gudoomiyaha Degnada Godobjiraan Yuusuf Maxamed Faarax ayaa maanta ka yagleelay tuulada Godob-caduun oo ka mid ah tuulooyinka hoosyimaada maamulkiisa fasalka 1aad ee dugsiga hoose kaas oo markii ugu horeysay lagu bilaabay 35 caruur ah oo ku nool tuuladaas
Godob-caduun ayaa 30 Km u jirta magaalada Godobjiraan oo ka tirsan Gobolka Nugaal, Wuxuuna gaarsiiyay Gudoomiye Yuusuf Maxamed Faarax agab waxbarasho oo qeyb ka noqonaya bilowga iskuulka tuulada Godobcaduun.
Waxaana ka mid ah agabka uu halkaas geeyay maamulka degmada Godobjiraan Kuraas,Miisas,Buugaag,Qalimaan,Sabuurado iyo Macalimiin loogu tala-galay inay muddo lix bilood ah wax baraan caruurta halkaas ku nool.
Sidoo kale Gudoomiye Yuusuf Geesa-weyne ayaa ka dhagax dhigay tuulada Godob-caduun goob loogu tala-galay mustaqbalka dhow in Iskuul waxbarasho looga dhiso tuulada Godob-caduun oo ka mid ah tuulooyinka waaweyn ee dad badan ku nool yihiin oo hoosyimaada Maamulka Degmada Godobjiraan ee Gobolka Nugaal.
Wuxuuna ugu baaqay Gudoomiyaha Degmada Godobjiraan Wasaarada Waxbarashada Puntland, Jaaliyadda Dibada Ku nool iyo Hay,addaha Samafalka inay gacan ka geystaan dhismaha xarun waxbarasho oo loo helo caruurta ku nool tuulada Godob-caduun.
Abshir Dhiirane
PUNTLAND POST
The post Maamulka Godobjiraan oo waxbarasho ka bilaabay tuulooyinka appeared first on Puntland Post.