Bosaso: (pp)- Kulan Aqoon iswaydaarsi ah oo ay qeyb galeen Guddoomiyaasha degmooyinka Qardho,Bosaso iyo Bandar Bayla,maamulka gobolka Bari,maamulka Gobolka Karkaar iyo Waaxyaha Biyaha,Waxbarashada iyo Caafimaadka Gobolada Bari iyo Karkaar ayaa lagu qabtey magaalada Bosaso.
Ujeedada kulanka oo la xiriirta sidii ay ka qeyb galayaashu uga doodi lahaayeen baahinta maamulka iyo dejinta siyaasada baahinta maamulka ayaa kusoo aadaya xilli magaalooyinka iyo Degmooyinka dadweynaha Puntland uga diyaar garoobayaan ka qeyb galka doorashooyinka ugu soo horeeya ee lagu wado inay Puntland ka qabsoomaan 15 July ee la xiriira Goloyaasha deegaanka.
Agaasimaha Qorshaynta Wasaarada Arrimaha gudaha iyo dowladaha hoose Maxamed Cali Nuur Jubba ayaa sheegay in Wasaarada Arrimaha Gudaha Puntland ay go’aansatay sanadka 2013 in baahiso maamulka.
Waxaana uu Juba intaas ku daray inay muhiim tahay in nidaamka maamulka laga soo dhiso hoos dabadeedna kor loo sii wado,midaas oo uu ku tilmaamey inay saldhig u tahay maamul baahinta.
Guddoomiyaha Gobolka Bari Cabdisamad Maxamed Galan oo isna ka mid ahaa masuuliyiinta kulanka ka qeyb gashey ee ka hadlay ayaa soo dhoweeyay qorshaha ay wado Wasaarada arrimaha gudaha Puntland.
Kulanka midkii ka horeeyey ayay wasaaradu horey ugu soo qabatey magaalada Garowe ee caasimada Puntland, waxayna qeyb ka yihiin kulamadani balan qaadyo horey uga yimid Madaxweynaha Puntland oo sheegey inay ka qaban doonaan mudada uu joogayo Xafiiskiisa.
Daawo Sawiro kale oo dheeraad ah.
Cabdiqani Cabdullaahi Cabdi.
Puntlandpost.com Bosaso,Soomaaliya.