Kismaayo: (pp)- Waxgaradka Jubbaland ee ka soo jeeda Digil iyo Mirifle oo shir ku yeeshay magaalada Kismaayo ayaa sheegay in taageersan yihiin shirkii kusoo idlaaday magaalada Addis Ababa ayna heshiiska ku gaareen DF ee Soomaaliya iyo Maamulka Jubbaland State.
Odayaasha dhaqanka ayaa fariin u diray shaqsiaaydkii ka danbeeyey Mudaaharaadyo la sheegay in ay ka dhaceen magaalada Baydhabo kaas oo looga soo horjeeday heshiiskii Addis Ababa.
Daawo Video
Odayaasha Digil iyo Mirile ee Jubbooyinka ayaa ku canaantay reer Baydhabo in aysan shuqul ku lahayn arrimaha Jubbaland, ee ay iyagu ka shaqeeyaan horrumarka deegaanada ay ku nool yihiin. Waxay kaloo sheegeen Waxgaradku in Beelaha dega Jubbaland ay heshiiyeen ayna ku heshiiyeen inay deegaankooda dhistaan , nabadgelyana ay kula wada noolaadaan dadka Walaalahooda ah ee ay la degan yihiin.
Sikastaba, Waxgaradka ka soo jeeda Jubbaland ee Beesha Digil iyo Mirifle ayaa sheegay in qof walba iyo reer Walba meesha uu degan yahay uu ka shaqeeyo nabadgelyadeeda, Laakiin Qabiil kore in isku shirqoolo ayey ku sheegeen mid khalad ah.
Deegaanka Jubbaland State ayaa noqonaya deegaankii ugu horeeyey oo ay wada degan yihiin Qabiilo badan oo Soomaaliyeed, haddana ku heshiiyey in ay si wanaagsan ku wada noolaadaan , isla markaana samaystaan maamul ay u wada dhan yihiin.
Puntlandpost, Kismaayo, Jubbaland State