Bosaso(PP): Wasiir ku xigeenka wasaaradda deegaanka & duurjoogta dowladda Puntland Burhaan Cilmi Xirsi ayaa sheegay iney wadaan mashruuc lagu dhisayo warshad samaysa gaaska la shito, taasoo sida uu tilmaamay qayb ka ah mashaariic ay doonayaan iney ku xakamayeen weerarka lagu hayo dhir jarida. Sida u wasiirku sheegay warshadaan ayaa abaabulkeedu hadda ka socdaa magaalada Boosaaso ee xarunta ganacsiga Puntland.
Waxa uu ammaan u soo jeediyay wasiir ku xigeenku dadkii ku guuleystay xakamaynta xaalufka isagoo ka dhawaajiyay iney socdaan tartammadii ay
gobolladu ugu jireen ciribtirka jarista dhirta iyo ka hortagga nabaad guurka, wuxuuna intaasi raaciyay iney dhiirri gelin weyn u samayn doonaan
dadka u ololeeya ilaalinta deegaanka,wuxuuna shacabka ka codsaday iney arrintaasi gacan ka siiyaan.
Tan & markii wasaaraddani la asaasay oo la kowsatay dowladdan iminka ka jirta Puntland ayuu sheegay wasiir kuxigeenku iney qabatay waxyaaba badan oo ay ka mid yihiin dhismayaal maamul oo ay ka hirgelisay wasaaraddu magaalooyinka waaweyn iyo kuwo haatan socda,goobo lagu barbaariyo dhirta oo ku kala yaalla Garoowe,Gaalkacyo, Boosaaso,iyo goobo kale haatanna ay sii ballaadhinayaan,isagoo sidoo kale xusay iney jiraan qorshayaal lagula dagaallamayo xermaysiga iyo biyaha mara meelaha aan munaasabka ahayn taasoo buu yiri loo aayi lahaa haddii laga
faa’iideysto xilliyada jiilaalka.
Wasaaradda deegaanka & duurjoogta ee dowladda Puntland ayaa dhow goor oo hore waxay ka dhawaajisay iney xakamayn doonto xaalufinta deegaanka iyadoo dejisay qorshayaal lagaga gaashaamanayo arrimhaasi, balse ma ahan kuwo sidii la rabay u hirgalay waxaana weli jira dad ku hawlan jarinta dhirta iyo samaynta kaamamka taasoo horseedi karta nabaad guur..
C/xamiid Salaad Barre
puntlandpost.com, Garowe