Madaxweynaha Dowladda Puntland oo dhowaan bilaabay safaro iyo kormeero uu ku tagayo deegaanada Puntland ayaa gaaray deegaanka Rakko-Raaxo oo ka tirsan G/karkaar , waxaana deegankaasi uu 85-km dhanka waqooyi bari kaga beegan yahay degmada Qardho ee xarunta Gobolkaasi.
Madaxweynaha oo ay weheliyaan masuuliyiin ka tirsan labada gole ee Dowladda ayaa si weyn loogu soo dhoweeyey degmada Rakko , waxaana uu Madaxweyne Gaas bartamaha magaaladaasi kala hadlay dadweyne aad u fara badan.
Madaxweynaha Dowladda Puntland Dr. Cabdi-weli Max’ed Cali Gaas ayaa shacabka Rakko uga mahad naqay sida diiran ee ay usoo dhoweeyeen isaga iyo wafdigiisa, wuxuu kaloo u sheegay in xukuumaddiisu ay ka tagayso deegaanada Fog ee Puntland si loo ogaado xaaladda dhabta ah ee ay ku nool bulshada ka baxsan deegaanada ku teedsan wadada laamiga ah.
” Ma aha in lagu koobnaado oo kaliya deegaanada saaran wadada laamig ah,taasi waa caddaalad darro , laakiin waa in la tagaa dhulka fog ee rafka ku yaalla, safarkii ugu horreeyey ee aan ku tagayo deegaanada lamiga ka baxsan idinka aya nasiib u yeeshay, insha allaahuna isbedelkii aanu ballan qaadnay waad naga arki doontaan” ayuu yiri Madaxweynaha Gaas.
Madaxweynaha Dowladda Puntland Dr. Cabdi-weli Max’ed Cali Gaas intii uu joogay deeganka Rakko, wuxuu kormeeray meelo kala duwan oo ay ka mid yihiin Hospitalka,Dugsiga Hoose/Dhexe,Saldhiga Ciidanka,Ceelka Biyaha iyo meelo kale.
Madaxweyne Gaas wuxuu bulshada Rakko u balan qaaday inuu mushaharkiisa ka bixin doono kharashka lagu dhisayo dhismayaal lagu kordhin doono Dugsiga Hoose/Dhexe ee Rakko, sidoo kalena uu dadaal dheer u galayo in degmadu ay hesho ceel biyood casri ah oo dadka iyo xooluhuba cabbi doonaan.
Aqalka martida ee degmada Rakko waxaa ka qabsoomay kulan waqti dheer qaatay, kaasi oo ay isku waraysteen qaybaha kala duwan ee Bulshada Rakko iyo wafdiga madaxweyne Gaas hogaaminyay, waxaana si qotta dheer looga arrinsaday sidii shacabka Rakko ay uga qayb qaadan lahaayeen adkaynta Ammaanka,Hormarinta Deeganka iyo arrimo kale oo muhiim ah.
Wafdiga Madaxweynaha Dowladda Puntland Dr. Cabdi-weli Max’ed Cali Gaas manta galinkii danbe waxay dib ugu laabteen magaalada Qardho, halkaasi oo ay xiligan gaareen, waxaana la fialayaa inuu safaro dheeraad ah ku tago meelo kale oo Puntland ka mid ah.
--DHAMAAD–