Garowe(pp) Darayle waa goob deegan beero leh oo ka baxsan magalada Garowe qiyaastii 10-KM dhinaca koonfureed kaga taal, Jimcadii shalay ayaa anagoo wariyaal iyo dhalinyaro kale isagu jirna waxaan ku tagney socod gaaban si aan hawo ka baxsan tan magalada uga helno.
Goobta waxaa maalin kasta oo Jimce ah ku kulma qoysas faro badan, dhalinyarada magalada iyo dumar si aad ah usoo labista kuwaasoo sawirro ku gala kuna soo wareega goobaha quruxda badan ee Darayle caanka ku tahay.
Beeraha ku yaala marka laga tago waxa kale Darayle dhinac mara toga weyn ee magalada kaasoo biyaha kasoo qaada ilaa iyo Burco, dhulka uu togaasi maro hareerihiisa ayaa ah cagaar indhuhu aysan ka daali karin, Maxamed Xirsi Jabra oo ka mid ah wariyaasha Puntland, Maxamed Cabdirisaaq Irbad oo safar shaqo u jooga Garowe iyo Cabdalla Owliye ayaa ka mid ahaa dhalinyaradii dalxiiska tagay Darayle kuwaasoo aad uga helay jawiga goobta iyo qof kasta siduu dantiisa ugu mashquulsan yahay.
Inkastoo Caasumaddu aysan lahayn goobo caan ah oo loo dalxiis tago Darayle ayaa kaalintaa buuxisey oo waxaa arkaysaan carruur arday ah oo ku dabaalaysana biyaha toga soo mara iyo kuwo kale oo dooga ku damaashaadaya dhammaan markaa waraysato waxay kuu sheegayaan inay u baahan yihiin goobahaan oo kale oo quruxda badan.
Duqa Garowe, Xasan Maxamed Ciise (Goodir) ayaa sheegay inay wadaan qorshe magalada loogu samaynayo goobo dalxiis ah sidaasi wuxuu ku sheegay waraysi uu siiyay maanta Radio Garowe.
Balse wariyaasha tagay Darayle ayaa soo jeediyay in aad loo ilaaliyo nadaafada goobtan maadama dad kala duwan ay iskugu imaanayaan una baahan tahay xitaa in lasoo qurxiyo oo loo sameeyo goobo kala duwan sida meelaha carruurta ku ciyaaraan, goobo fadhi leh oo lagu qaxweeyo iyo goobo kale oo lagu dabaasho.
DAAWO sawirro aan kasoo qaadnay Jimacaddii shalay Darayle.
War bixintan waxaa qoray Cali Cabdi Ducale.
