EYl-(Puntland Post) Wasiiru dowlaha arrimaha gudaha Puntland Cali Yuusuf Jaamac ayaa ku dhawaaqay natiijada doorashada hoggaanka sare ee gollaha deegaanka degmada Eyl, ka dib markii codayntii lasoo afajaray, waxayna xildhibaanadu mar kale doorteen Muuse Cismaan Yuusuf (Gudoomiye) iyo Faysal Khaliif Wacays oo gudoomiye ku xigeen noqday.
Cali Yuusuf Jaamac ayaa uga mahad celiyay sida wanaagsan ee ay xildhibaanadu wax u doorteen waxa kale uu u mahad celiyay shacabka degmada Eyl oo tan iyo markii howshan la bilaabay guddiga gacan siinayay sidoo kale waxa uu sheegay masuulkan in madaxda cusub shaqooyin horyaalaan.
Gudoomiyaha Gobalka Nugaal Cumar Cabdilaahi Faraweyna ayaa sheegay in doorashadu sidii loogu talo galay u dhacday oo aysan jirin wax khilaaf ama dhibaato ah oo soo food saaray, Cumar waxa uu u mahad celiyay dhammaan intii ka qayb qaadatay doorashada siodoo kale waxa uu sheegay inay muhiim tahay mamulkan cusub iyo shacabka inay wada shaqayn wanaagsan yeeshaan.
Doorashada markay dhacday iyo dhaarinta xilka, masuuliyiinta la doortay iyo kuwa goobjooga u ahaa ayaa banaanka xarunta dowladda hoose ee Eyl uga soo baxay halkaasna waxay kula hadleen dadwayne aad u faro badan oo doorashada la socday.
Duqa degmada Eyl ee marka kale lasoo doortay Muuse Cismaan Yuusuf ayaa u mahad celiyay xildhibaanadii codkooda siiyay sidoo kale waxa uu sheegay inuu ku faraxsan yahay taageerada ay shacabku u muujiyeen isaga iyo ku xigeenkiisa Faysal Khaliif Wacays.
Masuuliyiinta cusub ayaa shacabka Eyl u balan qaaday inay kasoo dhalaali doonaan waajibaadka saaran balse waxay sheegeen inaan la’aantood shacabka waxba la qaban karin loona baahan yahay inay mar kasta muuqato dowrka ay dadku lee yihiin.
Degmada Eyl ayaa ka mid ah degmooyinka muhiimka ah ee Gobalka Nugaal sidoo kale waxaa xarun taariikhi ah, masuuliyiinta ayaa sheegay inay goobtan ku banaan tahay dalxiiska iyo in taariikhda ku duugan wax laga barto.
PUNTLAND POST
The post Faah faahin ku saabsan doorashadii gudoomiyaha degmada Eyl iyo ku xigeenkiisa appeared first on Puntland Post.