Madaxweynaha dawladda Puntland Dr. Cabdiweli Maxamed Cali Gaas iyo waftigii uu hoggaaminayey ee shalay soo gaarey magaalada Muqdisho ayaa maanta 3 August, 2016 Xarunta Madaxtooyada Soomaaliya kaga qayb galay shirkii Madasha hoggaamiyayaasha Qaranka oo maanta furmay.
Shirka ayaa waxaa kasoo qayb galay Madaxweynaha dawladda Federaalka Soomaaliya, Ra’iisul-wasaaraha dawladda Federaalka, Ra’iisul-wasaare ku-xigeenka, guddoomiyaha Baarlamaanka Soomaaliya, Madaxweynaha dawlad-goboleedka Jubbaland, Madaxweynaha Maamulka Koonfur-galbeed iyo Madaxweyne ku-xigeenka maamulka kumeel-gaarka ah ee Galmudug.
Dhinaca Puntland waxaa shirka Madaxweynaha ku wehelinayey guddoomiye ku-xigeenka koowaad ee Baarlamaanka Puntland Cabdixamiid Sheekh Cabdisalaam, Wasiiro, Xildhibaano iyo Saraakiil ka tirsan Madaxtooyada dawladda Puntland.
Ujeedada shirkaan ayaa ahayd sidii loo dhammaystiri lahaa hawlaha qabyada ah ee la xiriira doorashooyinka iyadoo la ilaalinayo waqtiga yare e ka dhiman xilliga doorashooyinka iyo dejinta jadwalka hannaanka doorashooyinka labada aqal ee Baarlamaanka iyo Madaxtooyada iyo hawl-gelinta guddiyada doorashooyinka heer Federaal iyo heer dawlad goboleed
Shirkaasi oo ahaa labo qaybood ayaa waxaa wejiga koowaad kulmay Madaxda dawladda Federaalka iyo dawladaha xubnaha ka ah iyo guddiga doorashooyinka heer Federaal oo markii ugu horraysey kasoo qayb galay shirka Madasha isla markaana kasoo jeediyey warbixino la xiriira hawlohooda shaqo iyo qorsheyaasha u degsan.
Halka wejigii labaad ee shirkana ya kusoo biireen wakiillo ka kala socdey Beesha caalamka, iyadoona ay madasha iyo beesha caalamku ka wada hadleen diyaarinta dhaqaalaha ku baxaya doorashooyinka dalka ka qabsoomi doona iyo dhammaystirka hawlaha dhiman ee ay beesha caalamku qaybta ka ahayd.
Shirka ayaa socon doona labada maalmood ee soo socda waxaana si qoto dheer loogu lafo guri doonaa dhammaan arrimaha la xiriira hannaanka doorashooyinka dalka iyo qorshe hawleedka guddiyada doorashooyinka.
—DHAMMAAD—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
The post Madaxweynaha dawladda Puntland oo Muqdisho kaga qayb galay shirka Madasha wadatashiga Qaran appeared first on Puntland Post.