Wasiir kuxigeenka Wasaaradda deegaanka, ilaalinta duurjoogta iyo dalxiiska Puntland Faarax Cali Cabdi iyo Agaasimaha Waaxda qorsheynta iyo horumarinta siyaasadaha wasaarada deegaanka Liibaan Maxamed Faarax ayaa socdaal ku tagey deegaano ka tirsan Gobolada Nugaal iyo Mudug , gaar ahaan degmada Jariiban ee Gobolka Mudug iyo Tuulooyinka kala ah Reemanti iyo Mayle oo ka tirsan Gobolka Nugaal.
Ujeedada socdaalka masuuliyiintan ayaa salka ku haysay dayactirka iyo dib u howl-galinta xafiiskii daaqa qaranka ee dowladii dhexe ee Somalia ku lahayd Degmada Jariiban ,U kuur galida xaalada deegaanka, ilaalinta duurjoogta iyo wacyi galinta bulshada ku nool tuulooyinka Reemanti iyo Mayle.
Waftiga ayaa ugu horeyn socdaalkooda ku tagay degmada Jariiban , waxayna kormeer ku tageen halka ay ku taalo xaruntii hore ee daaqa qaranka degmada Jariiban taas oo ay hoy ka dhigteen dad shacab ah, Islamarkaana waxa ay ku guulaysteen xubnaha waftiga ee wasaaraddu in laga saaro dadka degan goobtaas dhawaan loo dayactiro.
Waftiga ayaa intii ay ku sugnaayeen Jariiban booqday goobaha muhiimka u ah bulshada sida iskuulada halka ay kulamo la qaateen Odoyaasha dhaqanka iyo bulshada .
Socdaalka waftiga oo ahaa mid qaatay saddex maalmood waxay sidoo kale kusoo mareen tuulada Reemanti iyo Mayle , Halkaas oo ay kulamo looga arrinsanayo iskaashi wax-qabad oo lagu ilaalinayo deegaanka kula yeesheen Odoyaasha iyo Qeybaha kala duwan ee bulshada ku nool .
Faarax Cali Abdi Wasiir kuxigeenka deegaanka iyo Liibaan Maxamed Faarax Agaasimaha waaxda qorsheynta wasaaradda ayaa is dultaagay wax-qabad ilaalada deegaanka iyo bulshada tuulada Reemanti ka sameeyeen arrimo lagaga hortagay xaalufka deegaanka sida goob ay kaga rogeen gawaari nooca xamuulka ah xaabo la doonayay in laga gurto nawaaxiga tuulada Reemanti ee Gobolka Nugaal.
Sidoo kale Wasiirka iyo waftigiisu waxa ay kala qeyb galeen bulshada iyo ilaalada deegaanka reemanti go,aan ay ku mamnuuceen bacda oo horey wasaaradda deegaanku ugu aqoonsatey inay tahay Sheydaanka dhirta , taas ay si wada jir ah ugu gubeen wasiirka iyo bulshada tuulada Reemanti goob fagaaro ah .
Abshir Dhiirane
PUNTLAND POST
The post Kormeer deegaanka loogu kuur-galayo oo ka bilowday Puntland appeared first on Puntland Post.