Maanta oo taarikhdu tahay 08 Sep, 2016 waxaa qabsoomay shirkii billaha ee guddiga fulinta mashruca tayeeynta iyo shaqaalaysiinta qaybo ka mid ah hay’adaha dowladda ee ka faa’iidaysanaya mashruuca Bangigu Adduunku maal-galinayo Dowladda Puntland-na ay fulinayso.
Shirkani waa markii ee uu qabsoomo waxana looga wada hadlay arrimo aad muhiim u ah oo ay ka mid yihiin halka uu marayo nidaamkii shaqo qorista, shaqalaysiinta da’yarta ka qallinjabisay Jaamacadaha, tababarka iyo tayaynta shaqalaha Dowladda.
Shirka ayaa waxaa daah-furay agaasimaha guud ee Wasaaradda shaqada iyo shaqaalaha Jibriil Maxamed Saalax, waxaa uu tilmaamay in hannaanka shaqaalaysiinta da’yartu uu si wanaagsan u socdo.
Agaasimaha Guud ee Wasaaradda Qorshaynta iyo Xiriirka Caalamiga Mudane Xuseen Cabdi Jaamac uga mahadceliyey Madaxda guddiyada ee ka soo qayb-galay shirka, isagoona sheegay ujeedada kulanka iyo waxyaalaha u baahan in laga wada hadlo.
Madaxa guddiga tayaynta iyo xiriirinta mashruuca Maxamed Cabdullaahi Maxamed ayaa akhriyey ajandaha shirka isla markaana waxa uu xusay in dhowaan uu furmi doono shirkii Madaxda Sare ee guddiga kaas oo wax badan lagu sii lafo guri doono sidii isla markaana dib loogu jalleeci doono horumarradii la gaarey muddadii uu mashruucu socdey iyo qorshe yaasha cusub ee la higsanayo.
Guddoomiyaha Hay’ada shaqaalaha rayidka ah Mudane Mustafe Siciid Shabac ayaa ka war bixiyey nidaamkii shaqo qorista isagoo sheegay in uu marayo meel aad u wanaagsan, isla markaasna ay ilaa iyo hadda shaqo bilaabeen 27kii qof ee ku guulaystay in ay heelaan fursadaan shaqo (Madaxqaybeedyada HR, Procurement iyo Finance Unit Heads) sidoo kalena ay dhowaan shaqo bilaabi doonaan dadka ku guuleysta Madaxqaybeedyada (M&E, ICT iyo Policy Planing & Research).
Ugu danbayntii, shirka ayaa ku soo idlaaday jawi degan, waxana laysla fahmay waxyalihii laga wada hadlay intii uu kulanku socday.
–DHAMMAAN—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
The post Guddiga tayaynta shaqaalaha iyo Shaqaaleysiinta Puntland oo shiray appeared first on Puntland Post.