Garowe (Puntland Post):- Maanta oo ku beegan xuska maalinta dhimirka adduunka ayaa lagu qabtay magaalada Garowe, waxaana uu uga warbixiyay xaalada ay ku sugan yihiin dadka dhimirka la,a ururka Nasrulaah oo gacanta ku haya xarunta lagu xanaaneeyo dadka dhimirka la,a oo ku taala bariga magaalada Garoowe.
Waxaana hal ku dhigeedu ahaa munaasabadii maanta lagu xusayay maalintan “AAN LA DAGAALANO MAANDOORIYAHA” waxaana kasoo qayb-galay Duqa magaalada Garowe Xasan Maxamed Ciise (Xasan Goodir) Suldaan Siciid Maxamed Garaase,Gudoomiyaha Ururka Nasrulaah Xaawo Qeylo-weyne, iyo Dhakhaatiir ka socotay QARAN Hospital.
Xaawo Qeylo-weyne Gudoomiyaha Ururka Nasrulaah ayaa sheegtay in la asaasay xaruntan 11 sano ka hor, waxayna xustay in lagu daaweeyay mudadii ay jirtay 188 qof oo caafimaaday halka 300 oo kalena dib ugu laabteen eheladoodii ,iyagoo aan uga biskoon xanuunka sidii la rabay.
Maanta waxaa ka baxay xarunta dadka dhimirka la,a ee Garowe 4 qof oo labo haween tahay iyo labo rag ah, ka dib markii ay ku caafimaadeen mudadii ay ku jireen.
Waxay sheegtay Gudoomiye Xaawo Axmed Maxamed (Xaawo Qeylo-weyne) inuu xaalad adag ku shaqeeyo isbitaalka dadka dhimirka la,a ee ku yaala Garowe,Iyadoona ka codsatay dadka wax haysta iyo Dowladaba inay lasoo gaaraan taageero bini,aadamtinimo oo lagu daryeelo dadka uu haleelay xanuunka dhimirka .
Dr Khaalid oo ka mid ah dhakhaatiirta ka howl-gasha Isbitaalka Qaran ayaa sheegay inay muddo caawinayeen xarunta ay ku jiraan dadka dhimirka la,a ee ku taala magaalada Garowe,wuxuuna ugu baaqay qeybaha bulshada inay joojiyaan isticmaalka maandooriyaha , Isagoona hoosta ka xariiqay inuu QARAN HOSPITAL sii wadi doono taageerada uu siiyo xaruntaan.
Ugu danbeyntii Duqa magaalada Garowe Xasan Maxamed Ciise ayaa uga mahadceliyay ururka Nasrulaah sida uu isugu xilqaamay xanaaneynta iyo daaweynta uu u sameeyo bulshada kuwooda uu haleelay xanuunka ku dhaca dhimirka.
Abshir Dhiirane
PUNTLAND POST
The post Xuska maalinta dhimirka oo maanta lagu qabtay Garowe appeared first on Puntland Post.